Boodskap van die hoof, Mnr. Harmse

In vandag se gejaagde lewe het ons aan kitsoplossings gewoond geraak. Ouers voel hul kinders moet ʼn voorsprong kry en as gevolg daarvan is daar geen perke aan ‘ekstras’ nie. As ons kinders gelukkig is, is ons puik ouers.

Ongelukkig is dit ver van die waarheid. Elke kind is anders en uniek. Elkeen groei teen sy eie pas en ons moet tyd maak om ons kinders te leer ken. Ouers met twee of meer kinders in die huis sal daarvan getuig. Eienskappe van Ma en Pa is in elke kind teenwoordig.

Om deel te wees van iets, is belangriker as om te wen. Kinders wat skool toe kom met die gevoel van geborgenheid en aanvaarding, is gelukkige kinders. Die wete dat ek vir my ouers die belangrikste persoon is, maar dat ek my uiterste bes doen. So stel ons mekaar nie teleur nie. Ek sal hard werk, al kry ek nie 100% vir ʼn toets nie. Niemand is perfek nie, daarom is ek feilbaar. Soms sal ek onoordeelkundige foute maak, maar dis nie die einde nie en so leer ek.

Aanmoediging  is belangrik, maar onnodige druk laat kinders foute begaan. As jy jou skoolloopbaan as ʼn marathon – en nie ’n resies aanpak nie – sal jy besef dit nie tydens jou skooljare eindig nie. Ouers se insette word wel minder soos kinders leer om meer verantwoordelikheid te aanvaar. Elke kind se volwassewording geskied op sy eie pad en sy eie tyd.

Laastens is ouer kinders in die huis ʼn groot uitdaging. Elkeen moet verantwoordelikhede volgens sy ouderdom ontvang. Die jongeres kan gou dink hulle is groot en word dan met dinge gekonfronteer wat nie ouderdomsgepas is nie. Ongelukkig kan die horlosie nie teruggedraai word nie.

Geniet die marathon saam met u kinders. Gun hulle die geleentheid om self die op- en afdraandes van die lewe te hanteer. Moedig aan en vee trane af. Waak daarteen om u kind se resies oor te neem of hul vertroue te verloor. Geniet dit. Dit kan somtyds uitdagend wees, maar dit is altyd die moeite werd.

God se seën op u en u kind se marathon. Ons is daar vir ondersteuning en aanmoediging. Kom ons vat hande!

Blitsskakels

Scroll to Top